[align=center]الـسـفـيـنـه
ضاقت وساع الفيافي والوعد متن السفينه
للطريق اللي دعاني بعد امان الله وامانه
لا تناديني وصوني قلبج الله لا يهينه
لا يراهن في رجوعي لأجل لا يخسر رهانه
ليه ما ارحل عن غرامج بعد ما ذقت الغبينه
اذكري لي شي واحد يستحق اقعد عشانه
قلب ما حن لوصالي ماني بحاجة حنينه
واشهد انه ما يعزر بالرفيع الا هوانه
الهوا الغدار حد الله ما بيني وبينه
والرجل لا خير فيه ان ما حفظ قدره وصانه
واحد مثلي ليما حدته عوجا سنينه
ما شكى لأقرب بن آدم لو هو اغلى من اخوانه
يوم قلبي ما عصاج وما قدرتي تذبحينه
ليه خنتي فيه وانتي معه من نفس الديانه
كان ذبحي بأيدج ارحم لي من اللي تفعلينه
وان طلبتج تذبحيني ما ذبحتيني لعانه
كل جرح من جروحي تذكرينه تنكرينه
كان مالج في نزيفه يد خانت بالامانه
ينزف الخافق تواضع لين لطختي جبينه
والا انا ما كنت ابيها تاصل لحد الاهانه
قلت من باب الميانه صاحبج وتعذبينه
لعن ابوج ارخي معاي شوي ما صار ميانه
طعت عقلج يوم قيل ان العقل بالبنت زينه
لكن الشرهه علي اللي كنت احسب انج تكانه
من بعد ما كنتي انتي في حشاي اغلى سجينه
بأوعدج ابطلق سراحج واتهمني بالإدانه
وين رايح ؟ لأي درب ما يرجع للمدينه
ليه رايح ؟ لأن قلبج ما ترك قلبي وشانه
كيف ابنسى ؟ ربي اللي ملهم القلب السكينه
مثل ما عانه بقربج لانوى فرقاج عانه
كان قاسي يجرح اطراف السكاكين السنينه
ما يطيح وبنت مثلج حبها هزت كيانه
والا انا خابر خفوقي ما يمد الا الثمينه
وان بغى يغيض الثريه قعد القمره وزانه
مزعل لأجلج هنوفاً رجت عقول رزينه
وان تهادت بالطريق الجرهدي تزهر جنانه
جادلاً كن الجمال قبالها كتف يدينه
والقمر لو شاورت له ينزح وتقعد مكانه
كانت اول من تحكم في فروع الياسمينه
وان تعدتهن تفنن خيزرانه .. خيزرانه
بعتها لأجلج وصارت لأصغر اطرافج رهينه
والا هي لفتت هدبها تغمرج ثقل ورزانه
والخفوق اللي تغذى من معزة والدينه
مشكلته انه تعلق في زمن ما هو بزمانه
كل ما زادت جراحه واكتشف غلطة ظنينه
صدقيه ان قال ما به شخص يستاهل حنانه
يوم نادى يا فلانه ما رضيتي تسمعينه
لين صوت يا فلانه .. يا فلانه .. يا فلانه
كنت اشوفج زعفرانه تقرظ الورد وتدينه
يمكن اني ما قطفتج بس اشوفج زعفرانه
كنت اهاب البعد عنج واطلبج لا تذكرينه
كان خوفي من الفراق وخطوة الفرقا جبانه
ما اقتنعت ان الخيانه للرجل تلوي يمينه
لين ما ربي بعثج وذقت من طعم الخيانه
اسمحي لي ما بقى فيني مكان تطعنينه
واقبلي من جوف قلبي كل عطفه وامتنانه
والله الله في عذابج ابتركج عينج ابعينه
دلليه ولا يرده عن شقاج الا لسانه
والا انا قررت اسافر وامتطي ظهر السفينه
لأن ما به شي واحد يستحق اقعد عشانه[/align]
هذه الرسالة تفيد بأنك غير مشترك. للاشتراك الرجاء اضغط هنــا
السفينة (حامد زيد)
العرض العادي
